Per chattar la via en in ambient social ch'è suttamess era en l'avegnir a grondas midadas e ch'è caracterisà tras medias e tecnologias d'infurmaziun, ston las scolas e las persunas d'instrucziun s'occupar attentamain cun ils novs svilups e prestar ina contribuziun a favur da la furmaziun d'informatica e medias. Perquai che la discussiun davart la dumonda, tge che la scola po e duai prestar en quest sectur, na po anc ditg betg vegnir terminada, è il plan d'instrucziun da quest modul da chapir sco punct da partenza per sviluppar vinavant a moda averta la chapientscha dal rom medias ed informatica.
Il plan d'instrucziun dal modul medias s'occupa da la furmaziun da medias e dal diever da medias e descriva las cumpetenzas specificas necessarias. Sa basond sin ils emprims contacts cun medias tradiziunalas e digitalas, che han lieu avant l'entrada en scola ed en il 1. ciclus, applitgeschan las scolaras ed ils scolars questas medias pli e pli savens sco utensils. En tut ils ciclus discurran els davart lur diever quotidian da las pli differentas medias en l'instrucziun ed il temp liber. Consequenzas giavischadas e problematicas vegnan tematisadas en l'instrucziun, cun la finamira ch'els sappian ir enturn a moda conscienta cun las medias. Per promover la chapientscha da la moda e maniera, co che las medias utilisadas funcziunan, vegnan era elavurads concepts e princips generals ed abstracts. Ultra da las enconuschientschas specificas giogan aspects pedagogics ina rolla en la furmaziun da medias. Qua tras vegnan promovidas la furmaziun da l'identitad, la creativitad sco era l'abilitad da percepziun e d'expressiun ed i vegnan incitadas ponderaziuns eticas.
Per che las scolaras ed ils scolars possian s'occupar a moda constructiva cun atgnas experientschas cun medias, èsi impurtant ch'els possian purtar e discutar quellas en l'instrucziun.
La responsabladad educativa per las medias ch'ils uffants e giuvenils dovran ordaifer la scola han ils geniturs e las persunas responsablas per l'educaziun. La scola ha l'incumbensa da furmar e da sustegnair ils adolescents uschia, ch'els san duvrar las medias cun responsabladad.
Areguard las medias duvradas dals uffants e giuvenils han la scola ed ils geniturs mintgamai incumbensas cun atgnas prioritads ed ina responsabladad correspundenta. Per pudair ademplir quellas dovri in barat tranter scola e geniturs.
Il champ da cumpetenza informatica s'occupa cun l'automatisaziun da l'elavuraziun d'infurmaziuns. Las scolaras ed ils scolars emprendan da chapir las datas sco preschentaziun simbolica d'infurmaziuns e survegnan ina invista dals princips e da las metodas da l'administraziun, evaluaziun e segirezza da datas. Sin basa da la descripziun e l'analisa d'andaments simpels emprendan las scolaras ed ils scolars da chapir strategias da soluziun fundamentalas per numerusas incumbensas e da descriver quellas sco algoritmus. Cun programmar vegnan translatads process ed andaments en ina lingua ch'il computer chapescha, uschia ch'el permetta in'elavuraziun automatisada da datas. Differents concepts fundamentals da l'informatica pon vegnir intermediads era senza duvrar il computer.
En l'instrucziun d'informatica è il scuvrir independent gist uschè impurtant sco l'intermediaziun da savida e metodas. Bleras incumbensas pon vegnir schliadas l'emprim cun experimentar a moda independenta. Tras las experientschas rimnadas vegnan scuvridas strategias da soluziun generalas. Cun programmar autras incumbensas vegni examinà, sch'ellas funcziunan correctamain, ed en cas da basegn vegnan ellas meglieradas. Il process da l'incumbensa fin al product final duai vegnir realisà a moda uschè independenta sco pussaivel. En quest connex emprendan las scolaras ed ils scolars era da cumplettar la lingua da programmar cun funcziuns e proceduras sviluppadas sezs, cun la finamira da simplifitgar la communicaziun cun il computer e da realisar atgnas ideas creativas.
L'informatica vala sco tema abstract. L'informatica po vegnir intermediada cun success en la scola populara, sche quai vegn fatg a moda tschiffabla e chapibla. Ultra dal connex cun il mund real tar la tscherna dals exempels stoi perquai vegnir guardà d'intermediar ils concepts d'informatica tant sco pussaivel era a moda ludica e sa referind a l'agir. Sensurs, acturs e roboters collian il mund abstract da l'informatica cun atgnas experientschas d'agir e cun l'ambient che vegn percepì dals uffants e giuvenils.
Las tecnologias d'infurmaziun e da communicaziun vegnan duvradas en scola sco instruments per l'atgna lavur. Per la lavur concreta vegn acquistada uschè blera savida sco quai ch'i vegn gist duvrà. Plinavant vegni dà paisa a la reflexiun dals avantatgs e dischavantatgs, da las pussaivladads d'applicaziun e dals effects. Uschia èsi lura pli simpel dad ir enturn cun novs svilups. L'introducziun da novas applicaziuns porta mo ina cumpetenza duraivla, sche las applicaziuns vegnan lura era duvradas regularmain. Quai duai vegnir resguardà per planisar l'instrucziun dals roms, en ils quals l'applicaziun respectiva vegn duvrada.
Ina part da las cumpetenzas d'applicaziun vegn acquistada en il modul medias ed informatica, las autras cumpetenzas d'applicaziun tutgan tar ils plans d'instrucziun dals roms. Cunzunt applicaziuns pli cumplexas fai senn d'introducir en unitads d'emprender specificas. Quai premetta che las persunas d'instrucziun pertutgadas discurrian ina cun l'autra.
Cumpetenzas d'applicaziun na sa laschan betg intermediar mo en passond. Ellas ston vegnir introducidas explicitamain resguardond premissas d'emprender eterogenas. Uschia ston las scolaras ed ils scolars per exempel emprender da deponer sistematicamain datas sco era da structurar e furmar preschentaziuns, texts u paginas d'internet.
Per pudair duvrar cumpetentamain in'applicaziun ch'è vegnida introducida en tala moda, sto ella vegnir duvrada concretamain en in context specific. Pervia dals connexs interdisciplinars è l'acquist da las cumpetenzas d'applicaziun ina sfida speziala per planisar l'instrucziun.
Il diever da tecnologias d'infurmaziun e da communicaziun tutga oz natiralmain tar il mintgadi dals uffants e giuvenils. Tar las scolaras ed ils scolars datti dentant grondas differenzas areguard l'access a las medias ed als apparats, il cumportament da diever e l'accumpagnament tras ils geniturs. Questas differenzas pon resultar da la derivanza sociala e culturala dals uffants e giuvenils, da lur schlattaina sco era dal stil d'educaziun dals geniturs u da las persunas responsablas per l'educaziun. Ellas ston vegnir tematisadas cun il quità necessari e resguardadas tar la concepziun da l'instrucziun, per pussibilitar a tut las scolaras e tut ils scolars da sviluppar cumpetenzas.
Gia al cumenzament dal 1. ciclus porschan medias analogas e digitalas pussaivladads creativas multifaras. L'experimentar a moda ludica cun maletg e tun e l'explorar las pussaivladads da s'exprimer a moda creativa han ina gronda impurtanza. Il diever da medias na stat en quest connex betg en concurrenza cun experientschas realas en l'agen ambient, mabain cumplettescha tal.
